This page was exported from მარშალპრესი [ http://marshalpress.ge ]
Export date: Sun May 28 10:28:38 2017 / +0000 GMT

მტკივნეული გადაწყვეტილებები - რა ხდება თეატრებში?




 

რა ხდება თეატრებში, მას შემდეგ რაც კულტურის მინისტრის წერილის თანახმად, საჭირო გახდა ხარჯების 10%-ით შემცირება. როგორც ცნობილია, ადმინისტრაციული ხარჯების შემცირება ყველა იმ დაწესებულებას შეეხება, რომელიც სახელმწიფო ბიუჯეტიდან ფინანსდება. ხარჯების დაზოგვა კი რიგ შემთხვევაში კადრების შემცირებას გულისხმობს.

 

ცოტა ხნის წინ "მარშალპრესისთვის" ცნობილი გახდა, რომ შოთა რუსთაველის სახელობის სახელმწიფო დრამატული თეატრიდან მსახიობი ზაზა პაპუაშვილი გათავისუფლდა. ზაზა პაპუაშვილი 2012 წლიდან საქართველოს პარლამენტის წევრია. ჩვენთვის ასევე ცნობილი გახდა, რომ ამავე თეატრში თანამშრომლების ნაწილისთვის ხელფასების შემცირების საკითხი დადგა.

 

„მარშალპრესი“ შეეცადა გაერკვია, რომელ თეატრებში დაიწყო ოპტიმიზაცია.

 

„რუსთაველის თეატრის“ იურისტმა ლაშა გოგინაშვილმა „მარშალპრესს“ განუცხადა, რომ თეატრში ოპტიმიზაცია რამდენი თანამშრომელს უკვე შეეხო:

 

„აქ საუბარია 2017 წლის სახელმწიფო ბიუჯეტზე. ჩვენ კულტურის სამინისტროდან მივიღეთ წერილი. სახელფასო ნაწილში  314 000 ლარით შემცირდა ბიუჯეტი. შესაბამისად, დღის წესრიგში დადგა შემცირება ხელფასების ან კადრების. რამდენიმე ალტერნატივა იყო, თვითონ სამინისტროს მხირდანაც გვქონდა რეკომენდაციები, რამდენიმე სამსახური სახელმწიფო შესყიდვებზე გადაგვეყვანა და მომსახურება ასეთი ფორმით მიგვეღო. თუმცა, მას შემდეგ რაც შესწავლა განხორციელდა და დადგინდა რომ ეს ბევრად უფრო დიდ ხაჯებთან იქნებოდა დაკავშირებული, მოგვიწია მტკივნეული გადაწყვეყილების მიღება.  რომ არ განხრცილებულიყო მასობრივი დათხოვნა სამასახურიდან, (დაახლოებით 54 კაცზე იყო საუბარი). საბოლოოდ, რუსთაველის თეატრმა გადაწყვიტა, საკუთარი ხარჯებიდან გამოენახა რესურსი ამ ადამიანებისთვის, რომ ყოველთვიურად ხელფასი მიეცა. ისინი გადავიყვანეთ შიდა შემოსავლებზე და იმ დანაკლის ნაწილში განხორციელდა რამდენიმე თანამშრომლის  შემცირება (საუბარია 5 თანამშრომელზე). ვისთანაც ხელშეკრულება შეწყდა არის პიარის თანამშრომელი, არის მსახიობიც...

ჯერ-ჯერობიოთ პროტესტი ამ გადაწყვეტილებას არ მოყოლია, არავის დაურეკავს ჩემთვის, არავისთვის მიუმართავს. ოფიციალურად დადგენილი წესით, შრომის კოდექსის გათვალისწინებით ყველაფერი განვახორციელეთ. ისე მოვახერხეთ, რომ მხოლოდ 5 თანამშრომელი გავათავისუფლეთ, იმის გამო, რომ ეს ოპტიმიზაცია 54 თანამშრომელს არ შეხებოდა. მათშორის ერთ-ერთი ზაზა პაპუაშვილია, რომელსაც გავუგზავნეთ წერილი, წესების დაცვით. მართლაც ძალიან სამწუხარო ფაქტია, თუმცა სხვა გზა არ გვქონდა. 

30 დეკემბერი იყო ბოლო სამუშაო დღე და დღის ბოლომდე ვფიქრობდით, რომელი მიმართულება აერჩია თეატრს, (აქ ხელმძღვანელობაზეა საუბარი) რა გაეკეთებინა იმისთვის, რომ ადამიანების გათავისუფლება აგვერიდებინა. აბსოლუტურად ყველაფერი კანონის ფარგლებში განხორციელდა და არავის უფლებები არ დაგვირღვევია. მე ვერ გეტყვით როდემდე გაგრძელდება ეს პროცესი. საბოლოო ჯამში, სახელფასო ნაწილში ჩვენი ბიუჯეტიდან 314 000 ლარი შემცირდა. ჩვენც ძალიან გვწყდება გული და ძალიან ვწუხვართ, ბევრი განვიცადეთ, ვინერვიულეთ.

აქ მუშაობენ ადამიანები, რომლებსაც 280 ლარი აქვთ ხლეფასი და მათ კიდევ რომ ათი პროცენტი დააკლო, საერთოდ ინეტერესს დაკარგავს სამსახურში სიარულის. ამიტომ ჯობდა ხელფასები შენარჩუნებულიყო და იმ კადრების გადახედვა მომხდარიყო, სადაც შემცირების განხორციელება შესაძლებელი იქნებოდა“, -  განაცხადა ლაშა გოგინაშვილმა "მარშალპრესთან".

 

 

ახმეტელის თეატრში აცხადებენ, რომ ოპტიმიზაციაზე საუბარი ჯერ არ დაწყებულა. ახმეტელის თეატრიც სახელმწიფო ბიუჯეტიდან ფინანსდება, ოღონდ არა კულტურის სამინისტროს, არამედ თბილისის მერიის კულტურის სამსახურის ბალანსზეა:

 

„ვერ დაგიდასტურებთ ვერაფერს, რადგან საუბარი ნამდვილად არ ყოფილა. მუშაობას ჩვეულ რეჟიმში ვაგრძელებთ, როგორც ადრე, ტყუილს ხომ ვერ გეტყვით. არანაირი ოპტიმიზაცია ახმეტელის თეატრში არ არის დაწყებული და ჯერჯერობით არც საუბარი მიმდინარეობს ამ საკითხზე“, - განაცხადა ლელა არაბიძემ "მარშალპრესთან".

 

თეატრ „გლობუსის“ მენეჯერმა ნატალია გომიაშვლმა, რომელიც ასევე თბილისის მერიის კულტურის სამსახურის ბალანსზეა, „მარშალპრესს“ განუცხადა, რომ ადმინისტრაციული ხარჯები 10%-ით უკვე შემცირდა, თუმცა კადრების შემცირება არ მომხდარა.

 

„ადმინისტრაციული ხარჯების შემცირება დაწყებულია. 10% ბიუჯეტიდან მოგვაკლეს. თანამშრომლები არ შეგვიმცირებია. ამბობენ, რომ ეს პროცესი ერთი წელი გაგრძელდება და ალბათ, ასე იქნება, არ ვიცი, ვნახოთ...“,  -  აცხადებს გომიაშვილი.

 

„გრიბოედოვის თეატრში“ კი აღნიშნულ საკითხზე ინფორმაციას არ ფლობენ.

 

„მარშალპრესი“ ასევე ესაუბრა თბილისის მიხეილ თუმანიშვილის სახელობის კინომსახიობთა თეატრის რეჟისორს ქეთი დოლიძეს:

 

„ეს უბედურება რომელიც საქართველოში დატრიალდა, იმედი მაქვს, რომ ძალიან მალე დასრულდება. ამ ახალი წლის წინ სამსახურიდან ქუჩაში გაყარეს ხალხი და თვითონ იგივე ხელფასები შეინარჩუნეს. ვიცი, რომ „მარჯანიშვილის თეატრიდან“ გაუშვეს ხალხი, ასევე „რუსთაველის თეატრიდან“ უშვებენ თანამშრომლებს. მე ვერავის ვერ გავუშვებ, არავინ მყავს დასაკარგი, ჩვენ ერთმანეთის გარეშე არ ვიქნებით. დაგვაკლდება ხელფასები? - დაგვაკლდეს. რატომღაც ყველამ დუმილი ამჯობინა და ერთი საპროტესტო სიტყვა არ ითქვა. მინისტრებს არა, მაგრამ მოადგილეებს არანორმალური დანამატები აქვთ, წლის განმავლობაში. მე მაინტერესებს ჩვენზე უკეთესი რა შექმნეს ამ ქვეყანაში? დარწმუნებული ვარ, გიორგაძეს ხელფასი როგორც ჰქონდა, ისევ ისე დარჩა! ჩვენსავით არ გაუბედურდა. ჩვენ ხელფასებიდან დაწყებული, ყველაფერი შევამცირეთ, რომ თანამშრომლები არ გაგვეშვა თეატრიდან. არც არავის გავუშვებთ! არ ვიცი ეს პროცესი რამდენხანს გაგრძელდება. 

 

ჩვენ, რომლებიც ყოველდღე ისეთ პროდუქტს ვქმნით და გაძეძგილია მთელი დარბაზი, ბილეთები არ იშოვება ხოლმე ჩვენს თეატრში, რატომ უნდა შეველიო  რომელიმე ჩემს თანამშრომელს ან ისინი რატომ უნდა შემელიონ მე?! 250 ლარი აქვს ჩემთან რამდენიმე მსახიობს, ამათ 25 ლარი მოვაკლოთ? აი, მე მაჟრიალებს ამ უბედურებაზე, რაც ახალ წლამდე 2 კვირთ ადრე დაგვატყდა თავს. ამას ვერასდროს შევეგუები. ეს უნდა აგვიხსნან რატომ მოხდა... 

 

ერთადერთი კაცი, ვისი იმედიც გვაქვს, ეს არის ბიძინა ივანიშვილი, რომელიც 5 000 და 6 000 არამარტო მსახიობსა და რეჟისორს, გვეხმარება, და პირადად დავით ნარმანიას, რადგან ერთადერთი ადამიანია, ვინც ჩვენი თეატრისკენ იყურება და ეცოდება ეს მსახიობები. ერთი ის იკითხეთ, როგორ ვახერხებთ ასეთი სპექტაკლების დადგმას? არასდროს შევეგუები იმას, რაც ახალ წლამდე გააკეთეს. მეტი სათქმელი არაფერი არ მაქვს. ჩემი თეტრიდან არავინ წასულა, არავინ არავინ წავა, მორჩა და დამთავრდა“! - აცხადებს რეჟისორი.

 

 

 

ასევე გთავაზობთ კოტე მარჯანიშვილის სახელობის სახელმწიფო დრამატული თეატრის მსახიობის ჯაბა კილაძის კომენტარს:

 

„არ მაქვს ამაზე ინფორმაცია, ჩვენთვის არავის უთქვამს რომ შეგვამცირებდნენ, ან ხელფასებს დაგვაკლებდნენ, მაგრამ რა მნიშვნელობა აქვს, ცუდი რამ ხდება ნამდვილად. მე როგორც ვხდები, თეატრების შიდა პოლიტიკაზე გადატყდება ჯოხი. თვითონ თეატრები რომ ასეთ მდგომარეობაში ჩააყენეს, ამაზე ვიტყვი ჩემს აზრს - მესმის რომ ქვეყანას რაღაც დონეზე უჭირს, ყველა კუთხით სჭირდება გვერდით დადგომა, ხელფასის დაკლება იქნება თუ სხვა რამ, ეს ყველაფერი ძალიან კარგად მესმის. მაგრამ დავიწყოთ იქიდან, რომ კულტურის სამინისტროს არ უნდა სჭირდებოდეს ქართული თეატრის ისტორიის წაკითხვა, მაგრამ როგორც ჩანს - სჭირდებათ.

გადახედონ და კარგად წაიკითხონ რას ნიშნავს საქართველოსთვის ქართული თეატრი, როდის ჩამოყალიბდა, როდის დაიხვეწა. და მაშინ როდესაც ისინი არაფერს წარმოადგენდნენ ქართული თეატრი მთელი მსოფლიო მასშტაბით ცდილობდა, საქართველოს კარგი კუთხით წარმოეჩინა. არ ვიცი ვის მოუვიდა თავში თეატრს შეხებოდა, თეატრებს რომლებსაც ისედაც მწირი ბიუჯეტი აქვს, მსახიობებს რომლებსაც ისედაც ძალიან რთულად აქვთ საქმე და ამის მერე ადამიანს კიდევ შენ ზევიდან 100 და 200 ლარს ჩამოაკლებ!..

იმის ნაცვლად იზრუნონ, რომ რამენაირად თეატრი უკეთესად დაფინანსდეს, ასე იქცევიან…  დღეს თუ რამე ძალიან კარგად მუშაობს, ეს ქართული თეატრია.

ყველაფერს რომ თავი დავანებოთ, ეს არის სულიერი მხარე, რომელზეც თაობები, მაგათი შვილები იზრდებიან. ის რომ გარკვეულწილად ადამიანებად ჩამოვყალიბდით ამაში დიდი წვლილი თეატრს მიუძღვის, ყველა განათლებული ადამიანი ამას მიხვდება.

მომწონს “chekin georgia”, იმიტომ რომ ეს აუცილებელია ჩვენი ქვეყნის პიარისთვის. მაგრამ ეს თეატრების ხარჯზე არ უნდა მოხდეს.

საქართველოში, სადაც თეატრზე ამხელა მოთხოვნაა, 90-იან წლებში, როდესაც შუქი, გაზი არ იყო, თეატრები არ  თბებოდა, ხელფასები არ იყო  - თეატრები არ დახურულა, ახლა არ უნდა ჩავარდეს ამ მდგომარეობაში. 

პროტესტის ნიშნად ყველა თეატრმა ფუნქციონირება შეიწყვიტოს, ხომ წარმოგიდგენიათ რა მოხდება...

რატომღაც არცერთი თოქ-შოუ ამ საკითხზე არ აქტიურობს, მაინცდამაინც უნდა ჩაიხადო, ვიღაცასთან დაწვე, ან წამალზე უნდა დაგიჭირონ, რომ გალაპარაკონ.

ამ ყველაფერს სწორად მთქმელი სჭირდება. ერთი-ერთზე იმ კაცს, რომელმაც ეს მოიფიქრა ძალიან ბევრ რამეს ვეტყოდი, ძალიან ბევრ რამეს ავუხსნიდი ისე, რომ მგონია, ძალიან მაგრად შერცხვებოდა...”, - განაცხადა მსახიობმა "მარშალპრესთან".

 

 

 

 


Post date: 2017-01-06 14:23:58
Post date GMT: 2017-01-06 10:23:58
Post modified date: 2017-01-06 16:44:30
Post modified date GMT: 2017-01-06 12:44:30

Powered by [ Universal Post Manager ] plugin. MS Word saving format developed by gVectors Team www.gVectors.com